دليل طباعة التيشيرت

دليل طباعة التي شيرت
طرق طباعة التيشيرتات بتختلف باختلاف عوامل زي الكمية و التصميم و لون التيشيرت و خامته و أحيانا حسب طبيعة التصميم و حجمه على التيشيرت وهل لازم يتطبع و بعدها يتقفل أو فيه امكانية لطباعته بعد تقفيله .
تعالى ندرس العوامل دي واحده واحده 
أولا الكمية : 
و ده العامل الأهم لأنه بيحدد السعر و الجودة 
الكميات البسيطة و الصغيرة دايما بتتكلف أكتر  لأن طرق طباعتها محدوده بمعنى انها تطبع سبلميشن لو فواتح و الخامة مخلوطة ( قطن و بوليستر ) أو سبلميشن على ورق فواتح لو الخامة قطن ؛ أو سبلميشن على ورق غوامق لو الخامة قطن و لونها غامق و الطريقة الأخيرة بتكون نتيجتها غير احترافية و غير مرضية للعميل لأن خلفية مربعة هتكون ظاهرة و داخلها التصميم ، إلا لو تم قصه أو تقطيعه على كتربلوتر بيقرأ سنيوهات ( كروسات أو علامات )
و الأفضل في الحاله دي التنفيذ على خامة فينيل برنت اند كت (طباعة و تقطيع ) سواء على ماكينة رولاند او اتش بي لاتيكس أو ميماكي و غيرها من الطابعات اللي بتطبع و تقص في نفس الوقت 
أو الطباعة على بلوتر الوان أو ماكينة ان دور و القص على كتر بعدسة ( بيقرأ سنيوهات ) 
و حديثا فيه اكتر من ماكينة في السوق بتقص الاوت لاين بتاع الطباعة و اسمها سكان اند كت ( مسح و قص ) و اشهرها ماركة برازر سكان ان كت بإصداراتها المختلفة - و دي كمان تنفع مع ورق الترنسفير سبلميشن. 
 و في حال عدم وجود صور في التصميم أو لوجو لون واحد ساعتها الحل الأمثل بيكون الفينيل الكت :
و هو فينيل حراري يتقص مقلوب و يتفرغ و يتكبس 
و ممكن تركيب أكتر من لون بس يكونوا جنب بعض أو جوه بعض.
و اخيرا الطباعة المباشرة بماكينات الفلات بد .
ده في حالة الكميات القليلة اللي بيتراوح تكلفة طباعة التيشيرت الواحد ما بين
10 ج و حتى 40 جنيه باستثناء السبلميشن الفواتح لأن تكلفته اقل .
= نيجي للكميات الكبيرة 
و دي أفضل طريقة لطباعتها هي الترانسفير سلك سكرين أو اوفست حسب التصميم 
و بتكون التكلفة أقل من 4 جنيه للتيشرت و حوالي 7 جنيه في الكميات اقل من 500 تيشيرت في حال الألوان الكتيرة في التصميم 
غير الترانسفير سلك سكرين فيه الطباعة المباشرة على التيشيرت سواء بالعجائن المائية ( ووتر بيز ) أو العجائن الزيتية ( زي البلاستيزول ) أو بعجينة الإزالة أو بطريقة ديبسبرس .
و كلها طرق ممتازة ( عيب البلاستيزول فقط في بطء الجفاف و الحاجة الى التنشير ثم الكبس ) و العيب العام للطباعة المباشرة صعوبة التنبأ بنسبة الهدر و الفاقد ( الا ما رحم ربي ) .
و الطرق دي بتكون التكلفة فيها بعد حساب التجهيزات على عدد ألوان التصميم الا في حال طباعة الشبكيات 4 لون و خلفية أو ازالة .
(منقول للافادة)