اتصل بنا الان +201101017272
Sublimation Info
#معلومات_سبلميشن
بما إن البوست اللي إتعمل إمبارح عن بداية شغل السبلميشن وإزاي ممكن تبدأ جاب صدي كويس والحمد لله ناس كتير إستفادت وحابين نكمل، فهنتكلم زي ما ناس كتير سألت عن طباعة التيشيرتات بشكل عام بالسبلميشن أو بطرق أخري وأنهي طريقة أفضل وأنهي أوفر وارخص وكل حاجة فيها علي قد ما نقدر ويارب نضيف معلومات مهمه للناس.
-*-*-*-*-*-*-*-*-*-
نسمي بالله، علشان نقدر نطبع تيشيرتات عندنا أكتر من أوبشن وهناخد أول أوبشن وهوا الطباعة الحرارية وفيها أكتر من طريقة. 
1- طباعة السبلميشن: دي بالنسبة للناس اللي عندها طابعات سبلميشن مزودة بحبر سبلميشن يعني، وطبعا مكبس حراري مسطح، دي من أرخص أنواع الطباعه لكن ليها قيود .. هيا أنك متقدرش تطبع علي أقطان أو أنواع كمان غير الاقطان، هنا هتقدر تطبع علي تيشيرتات أو أقمشة (بوليستر- مخلوط (بوليستر علي قطن)، ستان) بتنطبع بورق السبلميشن العادي تكلفة الورقة تقريبا بتكون 1 جنيه، التيشيرتات المخلوطة أو البوليستر بيكون  تصميماتها بسيطة جدا وكمان رخيصة بتبدأ من 17 و  18 جنيه وانت طالع والسعر النورمال ممكن يكون 25 جنيه. أكتر استخدامات التيشيرتات دي بيكون في حفلات التخرج او الحملات الانتخابية وخصوصا للناس اللي بتحتاج تطبع أعداد كبيرة ودا من باب التوفير أو الحصول علي سعر كويس. بالنسبة للجودة فبتكون حسب نوع الحبر المستخدم عند حضرتك .. الحبر السبلميشن فيه أنواع ب 170 جنيه وفيه ب 350 وفيه ب 500 جنيه، الجودة ف حبر السبلميشن هيا وضوح الألوان والثبات علي الخامه بعد الطباعه. 
-*-*-*-*-*-*-*-*-*-
2- طابعة الترانسفير: الترانسفير نوع طباعه مرتبط بالسبلميشن وممكن نطبعه علي نفس الطابعة اللي بنطبع بيها السبلميشن، وخطأ شائع أنه لازم الترانسفير ينطبع بحبر فوتو أو أن حضرتك لازم يكون عند حضرتك طابعه تانية غير السبلميشن بحبر فوتو علشان تقدر تطبع الورق الترانسفير، ورق الترانسفير بينطبع بشكل عام بأي حبر Ink اللي هوا الحبر السائل، سبلميشن أو فوتو مفيش أي مشكلة، دا ممكن نطبع بيه علي أي خامه سواء قطن أو بوليستر أو كتان أو جينز حتي، موجود منه نوع للفواتح يعني الألوان الفاتحه من الأقمشه زي الابيض ونوع للأقمشة الغامقة زي الأسود أو الكحلي أو البني، الفواتح سعره بيبدأ من 4 جنيه ل 6 جنيه والغوامق من 8 لحد 10 جنيه للورقة. جودة الورق اللي بالأسعار دي زي نوع Creation أو Fine بتكون ضعيفه جدا غالبا مع أول كام غسله هيبدأ ف الكرمشة والتقشير لان الورق دا صيني ومش غالي بنسبه لأنواع ورق تانية بتوصل ل 20 جنيه للورقة الواحدة. طبعا بينطبع عادي ويتكبس بالمكبس الحراري ومن عيوبه كمان أنه بيكون ليه خلفيه، يستحسن استخدام مقص لقص الزيادات قبل الكبس علشان الشكل العام للتيشيرت يكون كويس. النوع دا بيفضل استخدامه في التيشيرتات القطنيه اللي هتستخدم لمرة او مرتين، زي الفوتو سيشن أو تيشيرتات لمناسبة معينه زي العيد ميلاد مثلا .. مينفعش يكون تيشيرت خروج.
-*-*-*-*-*-*-*-*-*-
3- الفينيل Cut Only : فينيل التقطيع بيبدأ سعره من 60 جنيه ل 80 جنيه حسب المكان اللي هتشتري منه وحسب الخامه وجودتها .. اغلبه بيكون عرضه 50 سم وفيه منه 70سم .. المتر * 50 بيعمل مع حضرتك 6 تيشيرتات مقاس A4 وتقطيعه بيكون حوالي 20 جنيه ل 30 جنيه حسب المكان اللي هتقطع فيه لو مفيش عند جضرتك Cutter Potter، سعر الCutter بيبدأ من 4000 وأنت طالع حسب التصنيع والإمكانيات ومساحه العمل اللي فيه. نوع الفينيل دا بيكون لون واحد فقط مش بينطبع، بيدخل علي الكاتر يتقطع ويتكبس بالمكبس الحراري علي التيشيرت، دا بيصلح للتيشيرتات اللي بيكون عليها كتابه مش رسومات، أو رسوماته مش بألوان كتير لانه مش مطبوع هوا مجرد لون بيتكبس ع التيشيرت. نوع جيد جدا من الكبس ع التيشيرتات مش بيطلع بسهوله مع الغسيل أو مش بيتأثر بعوامل كتير ممكن تخليه يبوظ ف فترة قصيرة. ينفع يكون تيشيرت خروج أو يونيفورم وبيتكبس علي جميع انواع التيشيرتات وجميع خامتها.
-*-*-*-*-*-*-*-*-*-
4- الفينيل Print & Cut : نوع متطور عن الفينيل التقطيع فقط، دا بيكون نفس الفينيل اللي اتكلمنا عنه قبل دا ونفس الملمس البارز ونفس الجودة والمواصفات في مساحه الطباعه لكن بيكون أغلي لانه بيقبل الطباعه فسهل نطبع عليه أي تصميم احنا عايزينه وبيتقص من علي حواف الطباعه بحيث ميكونش فيه أي زيادات او خلفيه، المكنه اللي بتعمل كدة بتكون مكنه طباعه Print & Cut زي اللي بتطبع البانر أو هيا نفسها اللي بتطبع خامات البانر والفلكس والفينيل لكن مزودة ب Cutter بيقدر بعد الطباعه يقص الديزاين اللي انطبع بحيث يكون بدون أي خلفيات, سعر المكنه هنا غالي يعدي ال 100 ألف حسب مساحه العمل والنوع والتصنيع. سعر متر الفينيل هنا بيبدأ من 100 جنيه علي الأقل ولو هتطبع وتقطع برة السعر هيبدأ معاك من 50 جنيه للمتر.
-*-*-*-*-*-*-*-*-*-
5 والأخير - ترانسفير أمريكي : دا أسهل وأرخص نوع طباعه محترم ممكن يكون تكلفته قليله كمشروع، تقدر تطلع بيه نوع طباعه نضيف جدا يرتقي أن التيشيرت يكون خروج لو مطبوع بشكل إحترافي علي خامه كويسة. هنا بنستخدم فيه نوع ورق أشبه بالفينيل، لكن هوا عباره عن ورق A4، الورق دا بعد طباعته بيدخل علي Cutter Plotter زي اللي بنقطع بيه الفينيل لكن دا بيكون مزود بعدسه علشان يقدر يقرا الديزاين اللي حضرتك طبعته ويحدد الحواف بتاعته ودا انت بتعرف تعمله بالممارسه ويقطع الديزاين بحيث يكون بدون خلفيه تماما وبيتكبس بردو بالمكبس الحراري علي اي نوع من أنواع خامات التيشيرتات وبيكون حاجة محترمه جداااا .. الورقة هنا اعتقد سعرها تخطي ال 20 جنيه مش بكتير يعني، والكاتر بلوتر المزود بعدسه اسعاره بتبدأ من 13.000.
-*-*-*-*-*-*-*-*-*-
- فيه أنواع تانية من الورق الأمريكي بيكون سعرها 15 جنيه بالتقريب دي بتنطبع ليزر وفيه منها اعتقد Ink لكن انا بفضل ال Laser وفيه منها أنواع بدون خلفيه بدون ما تقص الخلفيه هوا بينطبع بدون خلفيه لكن عيبه أنه مش بينطبع عليه اللون الأبيض، يعني لو تصميمك فيه لون أبيض وحضرتك بتطبع علي تيشيرت لونه أسود فكدة اللون الأبيض مش هينطبع وهيكون مكانه لون التيشيرت نفسه اللي هوا الأسود. الورق الأمريكي كويس في الثبات علي الخامه وبيكون نتيجته أحسن بكتير من الترانسفير ال Ink الصيني الرخيص.
-*-*-*-*-*-*-*-*-*-*-*-*
فيه نوع كاتر بلوتر صغير إسه Cameo بحجم الطابعه أو أصغر بيقص ورق A4 ومزود بعدسه وسعره اعتقد لا يتعدي ال 5000 جنيه دا ممكن يكون مفيد للي ميقدرش يشتري كاتر بلوتر كبير. 
-*-*-*-*-*-*-*-*-*-*-*-*
النوع التاني من الطباعة ... هوا السيلك سكرين.
السيلك سكرين نوع طباعه ممتازة بشكل عام مش للتيشيرتات بس، لكن عيبوها هوا أنك لازم تكون بتعمل كميات من نفس الشكل، لان تجهيزات السيلك سكرين كتير ومعظمها شغل يدوي، مستحيل أن حضرتك  تعمل كل التجهيزات دي علشان تطبع تيشيرت أو حتي 5 أو 10 وطبعا كل مطبعه ونظامها يعني.
تكلفه الطباعه فيه رخيصة جدا وهوا أرخص أنواع الطباعه وبيدي نتايج حلوة بالنسبة للمحترفين في استخدامه مع استخدام نوع حبر نضيف طبعا وانا مش عايز أخوض في السيلك سكرين لأني مش محترف فيه نهائي.
لكن اللي أقدر أفيد بيه من معلومات أن طباعه السيلك سكرين كويسة لكن بتتفاوت حسب الصنايعي اللي بيشتغل ع المكن لأن ممكن مطبعه تطلع لحضرتك شغل مبهج وجميل جدا ومطبعه تطلع لحضرتك شغل اسف في اللفظ يترمي في الزباله. 
طباعه التيشيرتات بالنسبة للسيلك سكرين بالنسبة لشخص رايح يطبع في مطبعه ممكن يوصل ل 50 قرش حسب عدد الالوان والكمية المطبوعه. 
- فيه ورق ترانسفير للسيلك سكرين، أنا مجربتوش لحد دلوقتي لكن قريت عنه كتير ودا ورق بينطبع بالسيلك سكرين علي ورق، وبتقدر انت من الورق دا انك تكبسه بالمكبس الحراري بحيث الألوان تنزل علي التيشيرت.. دا بيكون مفيد للي محتاج يكبس شغله بنفسه أو يكون عنده Stock من ديزاين معين لكن ميكونش مطبوع علي الخامه الا بالطلب .. طبعا لازم تكون هتعمل كميه من الورق دا من نفس التصميم بحيث المطبعه ترضي تنفذه لحضرتك وبيكون سعره رخيص جدا بردو . 
-*-*-*-*-*-*-*-*-*-
النوع التالت والأخير .. هوا الطباعة ال UV 
دي طباعه مباشرة علي الأقمشه أو الخامات بشكل عام، سعر المكن ال UV غالي جدا مقارنه بالمساحه بتاعة العمل، يعني ممكن تكون المكنه اللي مساحه طباعتها A3 سعرها 175 أو 200 ألف جنيه، جودته رهيبه جدا وحاجة أقرب للخيال في بعض المكينات ال UV ودرجة ثباتها جميله جدا ومسلمسها وزي مانت عايز تقول في مميزات قول، تكلفة طباعة التيشيرت UV عند حد يمتلك المكنه وشغال لحساب الغير ممكن يكون 50 جنيه للتيشيرت الواحد .. جودة مفيش بعد كدة لكن غاليه وفي نفس الوقت جميله جدا.
-*-*-*-*-*-*-*-*-*-
الأسعار المتداوله للتيشيرتات : CK أشهر الأنواع القطنيه خامته معقوله مش وحشة موجود في العتبه النص كم سعره 20 والكم سعره 30 جنيه موجود منه ألوان كتير ومش شرط تشتري كميه .
فيه أنواع تانية عند شركات تانية الخامه الكويسة اللي ممكن تكون تيشيرت خروج سعرها هيبدأ من 40-50 جنيه للنص كم.
-*-*-*-*-*-*-*-*-*-
دا أشهر أنواع الطباعة الموجودة في السوق كالعادة البوست طويل جدا لكن هيكون مفيد بإذن الله للي بيدور علي المعلومات دي علشان يكون عارف ازاي يبدأ، وهينقذ ناس كتير كان في بالهم مشروع طباعه تيشيرتات وكانوا هيختاروا السيستم الغلط.
 
بالتوفيق للجميع وأي إستفسار هرد عليه علي قد ما أقدر، وبكرة نتكلم ف حاجة جديدة إن شاء الله
#معلومات_سبلميشن
#Sublimation_Info

Share this post